Македонски
Израелската армија синоќа ги бомбардираше предградијата на Газа од воздух и од земја, уништувајќи домови и протерајќи семејства од областа, а безбедносниот кабинет на премиерот Бенјамин Нетанјаху вечерва треба да се состане за да разговара за план за освојување на градот.
Локалните здравствени власти соопштија дека израелската армија убила најмалку 18 лица во синоќешните напади и пукања, вклучувајќи 13 лица кои се обиделе да донесат храна во близина на пунктот за испорака на помошта во централна Газа и најмалку две во куќа во градот Газа.
Канцеларијата на воениот портпарол на Израел соопшти дека ги разгледува извештаите.
Жителите на Шеик Радван, една од најголемите населби во Газа, рекоа дека областа била под израелско тенковско гранатирање и воздушни напади и вчера и утринава, принудувајќи ги семејствата да бараат засолниште во западните делови на градот.
Израелската војска во текот на изминатите три недели постепено ги засили своите операции околу Газа, а во петокот ги прекина привремените паузи во регионот што овозможуваа испорака на помошта, означувајќи ја како „опасна борбена зона“.
Тие полека навлегуваат во срцето на градот каде што се кријат стотици илјади луѓе, од исток, север и југ, додека ги бомбардираат тие области од воздух и од земја за да ги исплашат луѓето и да ги натераат да си заминат, рече Резик Салах, татко на две деца, од Шеик Радван.
Израелски функционер изјави дека безбедносниот кабинет на Бенјамин Нетанјаху ќе се состане вечерва за да разговара за следните фази од планираната офанзива за освојување на градот Газа, шѕто го опиша како последно упориште на Хамас.
Уште неколку недели не се очекува почетокот на целосна офанзива. Израел вели дека сака да го евакуира цивилното население пред да донесе повеќе копнени сили. Шефицата на Црвениот крст, Мирјана Шпољариќ, вчера изјави дека евакуацијата на градот би предизвикала масовно раселување на населението кое ниедно друго подрачје во Појасот Газа не е способно да го апсорбира, поради сериозен недостиг на храна, засолниште и медицински материјали.
Луѓето кои имаат роднини на југ отидоа да останат кај нив. Други, вклучувајќи ме и мене, не можевме да најдеме место бидејќи Деир Ал-Балах и Маваси се пренаселени, рече Гада, мајка на пет деца од населбата Сабра во градот.
Околу половината од над два милиона жители на енклавата моментално се во градот Газа. Се проценува дека неколку илјади го напуштиле градот и се упатиле кон централните и јужните области на енклавата, наведуваат локални извори.
Израелската војска ги предупреди своите политички лидери дека офанзивата ги загрозува заложниците што сè уште ги држи Хамас во Газа. Протестите во Израел со кои се бара крај на војната и ослободување на заложниците се интензивираа во последните недели.
Големи толпи демонстрираа протестираа синоќа во Тел Авив, а семејствата на заложниците протестираа и утринава пред домовите на министрите.
Се верува дека дваесет од преостанатите 48 заложници се уште се живи.
Во нападите на израелската војска врз Газа досега се убиени над 63.000 лица, претежно цивили, покажуваат резултатите на медицински извори во Газа, туркајќи ја енклавата во хуманитарна катастрофа и оставајќи голем дел од неа во урнатини.
