Македонски
Протестното движење на младите од таканаречената Генерација Зет се шири низ Европа, а Холандија е најновата земја во која се одржаа демонстрации проследени со полициски интервенции и апсења.
Во Хаг, во саботата биле уапсени 34 лица, претежно малолетници на возраст од 15 до 18 години. Според холандската полиција, приведувањата биле поради насилство на јавни собири, поседување забранети предмети и носење облека со која се прикрива лицето.
За време на протестите биле фрлани пиротехнички средства кон полицијата, а еден полициски службеник бил пренесен во болница поради сомневање за оштетување на слухот. И покрај тензиите, не дошло до масовни нереди и грабежи, какви што беа забележани во некои други европски градови.
Претходно, пораките што се ширеле преку Телеграм, Снепчет и други социјални мрежи повикувале на собирања во повеќе градови, меѓу кои Хаг, Мастрихт и Ајндховен. Во дел од нив имало и повици за ограбување трговски центри и уништување имот.
Поради страв од можни нереди, трговците во Хаг превентивно ги заштитувале излозите на своите продавници, додека училиштата во Мастрихт ги предупредиле родителите за најавените собири.
Протестите на Генерацијата Зет во Европа се поттикнати од незадоволството на младите поради високите трошоци за живот, недостигот од достапни станови, состојбите во образованието, ограничените можности за вработување и корупцијата.
Во Германија, викендов демонстрации биле организирани во повеќе од 30 градови, а дел од собирите прераснале во насилни инциденти, грабежи и судири со полицијата.
Слични протести во изминатите недели имаше и во Франција, Италија, Белгија, Албанија, Швајцарија и Португалија. Иако причините и барањата се разликуваат од земја до земја, заеднички именител е незадоволството на младите од условите за живот и чувството дека нивните проблеми не се доволно слушнати од политичките власти.
