Македонски
Жителите на канадската покраина Алберта, богата со нафта, на референдум го отфрлија планот за започнување правна постапка за отцепување од Канада, објавија водечките канадски медиуми врз основа на проекциите на резултатите, пренесува агенцијата АФП. Според неофицијалните резултати, опцијата за останување во Канада убедливо победила, освојувајќи повеќе од 75 отсто од гласовите.
Се работи за прв референдум за отцепување во историјата на покраината. Станува збор за важна победа за премиерот Марк Карни, кој се обидува да ја обедини земјата во услови на актуелната трговска војна со Соединетите Американски Држави.
Референдумот нема правно обврзувачки карактер, а жителите биле прашани дали сакаат да останат дел од Канада или да започнат законска постапка потребна за распишување обврзувачки референдум за отцепување.
Мнозинството граѓани гласаа за останување во канадската федерација, со што ја запреа иницијативата на сепаратистичките кругови кои бараа распишување обврзувачки референдум за независност. Иако гласањето опфаќало десет прашања, од кои некои се однесувале на имиграцијата и овластувањата на покраината, клучно било десеттото прашање. На него избирачите одлучуваа дали Алберта ќе остане канадска покраина или ќе започне уставно-правен процес за целосно отцепување.
Канадскиот премиер Марк Карни, кој пораснал во Алберта, со денови ја обиколуваше покраината и ги повикуваше сограѓаните да го отфрлат сепаратизмот, предупредувајќи дека победата на опцијата за отцепување би била „опасен блеф“ што би предизвикал години економска неизвесност. Карни истакнуваше дека зачувувањето на канадското единство е од пресудно значење во момент кога земјата е изложена на царински притисок од САД под водство на Доналд Трамп и на отворени закани со трговска војна.
Алберта ги поседува четвртите најголеми докажани резерви на нафта во светот, а сепаратистичкото движење со години се хранело со длабокото незадоволство на локалното население од властите во Отава. Многумина во покраината сметаат дека федералната влада ја кочи нафтената индустрија и им дава предност на источните покраини, како Онтарио и Квебек, особено за време на мандатот на поранешниот премиер Џастин Трудо. Конзервативната премиерка на Алберта, Даниел Смит, отворено го посочи Трудо како главен виновник за јакнењето на сепаратизмот.
Иако самата Смит се залага за останување во Канада, таа го распиша референдумот за, по примерот на Дејвид Камерон и брегзит, еднаш засекогаш да го затвори тоа прашање во рамките на сопствената конзервативна база. Карни, поранешен гувернер на англиската централна банка, кој одблизу ги следи последиците од брегзит, ги предупредуваше граѓаните да не ја повторуваат британската грешка надевајќи се дека со тоа само ќе испратат протестна порака до властите.
Референдумот се одржа и во сенка на сè поотвореното мешање од САД. Американскиот министер за финансии Скот Бесент претходно ја опиша Алберта како „природен партнер“ на САД, додека технолошкиот милијардер Илон Маск јавно порача дека и Алберта и Саскачеван треба да се отцепат од Канада. Карни остро одговори на ваквите пораки, порачувајќи му на Вашингтон да не се меша во внатрешните работи на Канада.
Ваквиот исход од гласањето носи големо олеснување за федералната влада во Отава, но аналитичарите предупредуваат дека незадоволството во западниот дел на земјата нема да исчезне преку ноќ и дека федералните власти ќе мора да најдат начин долгорочно да одговорат на барањата на нафтениот сектор во Алберта.
