Македонски
Измените на Законот за парламентарна истрага не ја добија поддршката од мнозинството гласачи на обврзувачкиот референдум во Словенија. Според речиси целосно обработените резултати, против измените се изјасниле 51,26 отсто од гласачите, додека 48,74 отсто гласале „за“, соопшти Државната изборна комисија на Словенија.
Податоците, објавени по пребројувањето на 99,97 отсто од гласовите, покажуваат дека на референдумот излегле 54,57 отсто од запишаните избирачи, со што бил исполнет условот за неговата важност.
Граѓаните истовремено се изјасниле и за три консултативни прашања. Мнозинството го поддржало предлогот работоспособните лица што примаат парична социјална помош, а немаат објективни пречки за работа, да имаат обврска активно да извршуваат општествено корисна работа.
Поддршка добил и предлогот правото на глас на локалните избори да го имаат само словенечките државјани и државјаните на другите земји членки на Европската Унија, без државјаните на трети земји што живеат во Словенија.
Кај третото консултативно прашање, за укинување на задолжителното плаќање придонеси за програмите на Радио-телевизија Словенија, резултатот бил речиси изедначен. Против предлогот се изјасниле 50,04 отсто од гласачите, наспроти 49,96 отсто што го поддржале.
Словенечкиот премиер Јанез Јанша во првата реакција изјави дека Владата ќе ја почитува одлуката на граѓаните. Тој оцени дека резултатите се охрабрувачки и ги опиша како показател за „здрав разум“, но предупреди дека земјата и натаму се соочува со значителни предизвици во споредба со други развиени демократии.
Јанша го оцени референдумот и како подготовка за следното изјаснување, кое го смета за особено важно за идниот развој на Словенија. Станува збор за најавениот обврзувачки референдум за Законот за развој.
На прашањето дали отфрлањето на законските измени претставува недоверба кон неговата Влада, премиерот одговори дека може да гледа кон следните месеци со оптимизам и мирна совест.
Поинаква оценка даде лидерот на словенечката опозиција и поранешен премиер Роберт Голоб. Според него, гласачите ја отфрлиле идејата на владејачката коалиција за воведување политичка полиција и покажале дека сакаат да продолжат да живеат во слободна и демократска земја.
Голоб оцени дека резултатите укажуваат на недоверба кон Владата на Јанша. Тој воедно изрази очекување дека граѓаните ќе го отфрлат и предлог-законот за интервентни мерки за развој на Словенија на следниот референдум.
