Македонски
Во Агенцијата за национална безбедност (АНБ) денеска се реализирала посета од страна на студенти од Факултетот за безбедност – Скопје, како резултат на предвидените иницијативи што произлегуваат од Меморандумот за соработка потпишан помеѓу Агенцијата и Факултетот.
Како што информираат од АНБ, посетата претставува значаен чекор во зајакнувањето на врските помеѓу академската заедница и безбедносните институции на државата.
Посетата е особено значајна, бидејќи за прв пат од своето основање, Агенцијата официјално ги отвори вратите за студентска публика. Оваа можност беше овозможена со поддршка и иницијатива на директорот на АНБ, Бојан Христовски, кој ја препозна важноста од непосредно запознавање на идните кадри со практичната работа и улогата на институцијата во системот на националната безбедност, велат од АНБ.
Во текот на посетата студентите имале можност да се запознаат со мисијата, надлежностите, организациската структура и оперативните приоритети на Агенцијата.
Преку предавања и презентации од страна на искусни професионалци и експерти, студентите добија поширок увид во начинот на работа, тековните активности и предизвиците со кои се соочува АНБ во контекст на заштита на уставниот поредок, спречување на разузнавачки и субверзивни дејствија, како и соочување со современи безбедносни закани. Особено внимание беше посветено на прашањата поврзани со борбата против тероризмот, сајбер-безбедноста, странското разузнавање и хибридните закани, кои претставуваат актуелни области од интерес и за академската заедница и за безбедносните институции. На тој начин, посетата придонесе за надградба на теоретските знаења на студентите со практични перспективи и реални искуства од терен, стои во соопштението.
Како то велат од АНБ, посетата е дел од пошироките напори за унапредување на практичната едукација, размена на знаења и креирање на отворен дијалог помеѓу академските институции и стратешките државни субјекти. Агенцијата за национална безбедност и Факултетот за безбедност ќе продолжат со имплементација на заеднички активности, вклучително и обуки, работилници и научни трибини, со цел градење на професионални капацитети и поддршка на младите во нивната професионална определба.
