„Шака јада“

Во политиката има една фраза која е чиста вистина. Ако сакаш нешто да забошотиш формирај комисија. Ова СДСМ и ДУИ си го имаат земено здраво за готово. Си ја ишкаат мувата од главата, што би се рекло.

Во ситуација кога за прв пат инстицуциите сериозно си ја вршат работата за трагедијата во Кочани тие бараат во Собранието да се формира Анкетна комисија, коментира авторот на ТВ Колумна „5 минути со Чавез“.

Анкетна комисија, се сеќавате каков циркус беше тоа кога слична ваква комисија се формираше за скандалот со Онкологија. Се караа, се расправаа, изготвија некој извештај и никому ништо.

Тој извештај, ниту суд, ниту обвинителство има обврска да го прифати и процесуира. Сега сакаат истата игра да ја повторат.

Да се наметнат како некако фактор, да седнат на маса и тие да кажуваат кој е виновен. Замислете, ДУИ и СДСМ да кажуваат кој е виновен и што треба да се направи. Па нив живи им изгореа луѓе во модуларната во Тетово, гореа луѓе и во автобусите на Дурмо и Беса транс.

Тогаш не видовме анкетни комисија. Уствари да, кабелот беше виновен. Ама па што требаше тогаш да направат, да се полеат со безнин.

Бензин сега не помага, туку одговорност. И тоа од сите партии без исклучок. Тоа ги боли СДСМ и ДУИ, дека во притвор има и нивни луѓе па сакаат одблиску да бидат во тек ако има следни апсења. Многу им е гајле за жртвите.

А ќе има нови апсења истрагата ќе се проширува па до каде доведе до таму. Веќе нема назад.

ДУИ пак оди чекор па бара во комисијата да бидат вклучени и странски претставници бидејќи не верувале на домашните. Не веруваат во оние институции во кои беа до вчера и од кои не можеме да се ослободиме бидејќи се напикани како крлежи.

Што сме ние Косово, Босна, некој протекторат па странци ќе ни го решаваат секој проблем дома бидејќи ДУИ така сака.

Како до сега веќе нема. Замислете, ДУИ и СДСМ се незадоволни од работа на обвинителите за истрагата во Кочани.

Главната истрага ја водат обвинителите Гаврил Бубевски , за кој сите знаеме кој е и што е, и Ислам Абази кому на врат му седеше братот на Али Ахмети. Значи ДУИ e незадоволно од своите кадри.

На Претседателот на СДСМ Венко Филипче пак во овие тешки денови му текнува на избори. Уште 40 дена нема поминато тој се секира кој ќе биде градоначалник на Кочани. Барал независен кандидат ама поддржан и од ВМРО-ДПМНЕ и од СДСМ.

Уште и бара лидерска средба. Исто како за анкетните, многу корист видовме во минатато од лидерските средби.

Ајде што тој формат лидерски не постои никаде, туку што ќе решат ако на маса со Мицкоски седнат Филипче, Али Ахмети, Зијадин Села, Мендух Тачи. Ќе се сликаат и толку.Убаво им рече министерот за здравство Арбен Таравари дека нема време за губење за лидерски средби кога се води борба за животот за секој настрадан од пожарот.

Сега не е време за сликање туку за работа. И тоа секој својата. А за дебата си има Парламент. Ене ги конечно почнаа со работа.

Шарената револуција два точка нула се распадна побрзо од што очекувавме. Надградена и проширена. Им снема кеш. Тие без кеш не знаат да функионираат.

Секнаа парите, а и тоа што остана треба да се подели со нивните инструктори од Србија. Ако за првиот собир за прегазувањето на Фросина и можеше да се затскријат дека тоа е класичен шарен протест, овој пат тоа не им помина.

Од каде да почнеме. На плакатите за повик како локација пишале народно Собрание. Како прво во Македонија нема народно собрание, туку само Собрание. Постои народна скупштина, ама таа е во Србија.Како повикот да им го пишувала инструкторката Сташа од Лесковац па овие само превеле на гугл транслејт.

Одиме понатаму. Како им текнува да ги рециклираат истите финти од шаренатата револуција кога се им помнуваше бидејќи поголем дел од луѓето навистина веруваа дека тоа е граѓански а не класичен партиски проект.

Се сеќавате на оние слики кога носеа чевли и патики пред влада кои требаше да ги симболизираат иселените млади.

Сега пак бараа пристутните да си донесат столчиња од дома глумејќи дека тие се гласот на народот.

Колку поддршка имаат се виде на протестот. Пред Парламентот немаше повеќе од 50 пристутни. Убаво напиша една од нив на Твитер, шака јада сме дојдени.

И навистина сте шака јада но и искористен балон од страна на две партии кои како политички некрофили бараат несреќа за да профитираат.

Дека ништо нема оригинално кај организацијата „Кој е следен“ покажува и нивното барање да се   објави целата документација поврзана со работењето на дискотеката.

Ова не би било ништо невообичаено ако не се знае дека и ова барање е по српско сценарио. Исто барање имаа и нивните „колеги“ од Србија по трагедијата во Нови Сад.

Српските опозиционери во ликот на студентите бараа да се објави документација за падот на настрешницата.

Иако претседателот Вучиќ го објави поголемиот дел студентите излегуваа со нови и нови барања, со изговор дека тоа не е доволно.

Се разбира дека целта не им беше никаква настрешница туку политички притисок. Истото го сакаат и овде и тоа нема да има крај.

Со објавувањето на документите за пожарот во Кочани ќе се компромитира целата истрага и се разбира дека ова барање нема никој да им го исполни.

И она најважното, објавување на документи во фаза на истрага е кривично дело. Приведените и осомничените, со душа чекаат да излезат вакви документи во јавност.

Ова беа петте минути со Чавез. Кој е следен, до следниот перформанс на независните демонстранти.