Македонски
Претседателот на Алијансата за Албанците, Зијадин Села, денеска на Фејбук ореагираше на почетокот на примената на проектот „Безбеден град“, оценувајќи дека станува збор за селективна и камуфлирана форма на казнување која, според него, создава чувство на несигурност и неправда кај граѓаните, особено кај Албанците.
Тврдења за неправичност и финансиски притисок
Во своето обраќање, Села истакна дека проектот, наместо да ја зголеми безбедноста, ги прави граѓаните поранливи и изложени на притисок, неправично третирање и дополнително финансиско оптоварување. Тој апелираше до граѓаните за трпение и внимателност, нагласувајќи дека, како што рече, заеднички ќе се избори против проектот кој го оцени како дискриминаторски.
Села потенцираше дека граѓаните имаат доволно свест за сопствената безбедност и дека санкции се потребни исклучиво за оние поединци кои со своето однесување реално ја загрозуваат безбедноста. Според него, недозволиво е поради изолирани случаи да се казнуваат сите останати за мали пропусти и ситни невниманија кои не претставуваат вистинска опасност.
Повик до Уставниот суд
Без, како што нагласи, намера да се меша во независноста на судството, принцип кој неговата партија постојано го промовира, Села упати јавен повик до судиите на Уставниот суд. Тој побара итно и приоритетно да се разгледа иницијативата што Алијансата за Албанците ја поднесе пред неколку дена, а со која се оспоруваат законските измени поврзани со проектот „Безбеден град“.
Според Села, иницијативата содржи бројни аргументи кои, како што тврди, укажуваат на неуставноста на законските решенија. Тој побара што поскоро да се закаже седница за да се спречи, како што рече, дополнително комплицирање на состојбата, изрекување казни и „пљачка“ на граѓаните преку механизам за кој Алијансата е убедена дека на крајот ќе биде прогласен за неуставен.
