Македонски
Во Домот на културата „Кочо Рацин“ во Скопје денеска ќе се одржи завршната манифестација на Осмиот фестивал на поезија за деца „Стихувалки 2025“.
На настанот по вторпат ќе биде промовирана збирката со поетски творби насловена „Стихувалки 2025“, после промоцијата во Охрид на 24 мај, која беше поддржана од Општина Охрид во рамките на проектот „Културата расте со децата“.
Како што е најавено, на завршната манифестација ќе бидат доделени признанија на сите 97 автори застапени во оваа збирка. Исто така, ќе бидат доделени златна, сребрена и бронзена плакета за тројца автори на трите најдобри поетски творби за деца.
Плакета со специјална награда ќе се додели за најдобра песна од странски автор. Како и во минатите години и оваа година ќе се додели и специјална награда на автор чија песна добила најголем број гласови од публиката.
Сите наградени автори ќе добијат подароци од мироносната градина на сликарот и хуманист Живко Поповски – Цветин како и други подароци од организаторот и помагателите на фестивалот.
„Стихувалки 2025“ оваа година се реализира по осми пат како традиционална литературна манифестација којашто има првенствена цел да придонесе за книжевниот и културниот развој на литературата за деца, по пат на поттикнување на креативниот и творечкиот потенцијал на поетите кои пишуваат поезија за децата.
Како што соопштија организаторите, по распишаниот конкурс со свои творби аплицираа над 200 афирмирани и неафирмирани македонски автори од повеќе градови, како и автори од соседните држави. Од нив жири – комисијата избра 97 автори со нивните поетски творби коишто се објавија во заедничка збирка „Стихувалки 2025“.
-Сите објавени песни во збирката континурано беа објавувани на фејсбук страницата „Стихувалки – поетски фестивал“, со што и публиката имаше можност да гласа за своите фаворити. Гласовите на публиката влијаат, но не се одлучувачки при изборот за награди од страна на Жири – комисијата, соопштија организаторите.
Носител и организатор на проектот е издавачката куќа „Едука Мак“ – Скопје, а автор на проектот и програмски уредник е м-р Ели Маказлиева.
На настанот најавено е да се обратат членовите на Жири-комисијата – проф. д-р Кристина Николовска, проф. д-р Елизабета Бандиловска и проф. Лила Арсова
