Македонски
Седумнаесеттото издание на „БОШ Фестивал“, во организација на ЗГ „Арт Еквилибриум“- Гевгелија, ќе се одржи на 29 и 30 август 2025 година како дел од програмата на манифестацијата „Гевгелија град на културата за 2025 година“, информираа од Општината.
Во двата денови на одржувањето на Фестивалот пред публиката ќе биде прикажана богата културно-уметничка програма составена од изложби, филмски проекции, видео-арт, визуелни инсталации, музички настапи и радио-програма, со цел да се прикаже современата уметничка сцена и нејзината разновидност.
Првиот фестивалски ден, на 29 август, ќе почне со изложба на цртежи во комбинирана техника и инсталација „ПоПуСто%“ од Марија С. Богдановска, која тематски се осврнува на разликите во економската моќ на жените во сите сфери на општеството и разликите што влијаат врз нивниот емоционален, социјален и културен живот. Потоа следува изложба на фотографии од фотографот Столе Ангелов, како и видео-артот „На флипери“ од Јован Гаковски, дипломиран графичар, кој преку монтажа на флипер-игри од 90-тите, на ритам на музика, раскажува визуелна приказна од „Star Game“ до „Final Boss“. Планирано е прикажување на три филмови, а со диџеј сет на Мартчин во кафе-бар „У“ ќе заврши првиот фестивалски ден.
Вториот ден „БОШ“ се префрла на Стариот градски пазар каде премиерно ќе биде прикажан филмот „Мангава диско панк“, експлозивна драма/фикција која го следи единствениот панк-рок бенд во ромското гето Шутка, а по него и видео албумот „The Hip- Reality Overdrive“, проект кој е визуелна ремикс интерпретација на музиката на The Hip, алтернативен бенд од Куманово. Ќе биде претставена и визуелната инсталација „Колатерална штета“ на графичкиот дизајнер Ице Капсаров, како и инсталацијата за колаж „Ненаситни“-колажирање пропагандни плакати со Јана Деловска и Дамјан Илиќ, со цел активна дружба низ сечкање, реобмислување, ангажирање и активирање.
Музичкиот блок е составен од концерти на рок-триото „Харикири“ и „ПИЈАН СЛАВЕЈ“ -музичко-поетски формат.
Во двата фестивалски денови следува и целодневна викенд радио-репортажа од „БОШ Фестивалот“ на радио „Канал 103“
