Македонски
Директорот на Центарот за управување со кризи, Стојанче Ангелов одржа Координативната средба во ЦУК за решавање на проблемот со проодноста на шумскиот пат кон Солунска Глава при што би се добила поголема и побезбедна проодност на патот за давање помош на лица, а и за поголема превентивна противпожарна (ПП) безбедност при евентуални шумски пожари во тој предел.
Конкретно, една од причините за средбата е што во случај на итна потреба од медицински третман на лица, кои престојуваат во објектите на врвот Солунска Глава, во услови кога пристапот не е возможен по воздушен пат (со хеликоптер) извлекувањето на лицето/лицата, или доаѓањето таму, ќе мора да се изврши по шумскиот пат што води до врвот. Покрај конкретниот пат има високи дрвја што понекогаш паѓаат на патот и го попречуваат движењето на моторни санки и АТВ возила со гасеници во услови на снег, соопштија од ЦУК.
Превентивно, констатираната ситуација налага да се исечат дрвјата покрај патот, за да се овозможи безбедно, сигурно и непречено движење во снежни услови, а истовремено тој пат да се користи и како противпожарна пресека. Таа пресека заедно со патот, при евентуален шумски пожар би требало да помогне во спречување на проширување, а истовремено и во гаснење и на евентуален пожар од страна на ПП силите коишто би се движеле по него. Предложеното сите присутни претставници на институциите од Системот за управување со кризи едногласно го прифатија, по што секоја институција ќе постапи согласно преземените задачи во прилог на остварување на поголема проодност и безбедност на патот, согласно своите оперативни стандардни процедури.
На координативната средба присуствуваа претставници од Министерството за внатрешни работи, Министерството за одбрана, Армијата, Министерството за земјоделство, шумарство и водостопанство, Државен инспекторат за шумарство и ловство, ЈП „Национални шуми“ – ПШС „Караџица“, Акционерско друштво во државна сопственост за управување со воздушниот сообраќај и давање услуги во воздухопловна навигација М-НАВ АД Скопје и претставници од Центарот за управување со кризи.
