Македонски
Во првите два месеца од годинава од Македонија се извезени стоки во вкупна вредност од 75.650,4 милиони денари или 1,229 милијарди евра што е за 1,6 отсто повеќе отколку во истиот период во 2024 година. Во јануари и февруари годинава во земјава, пак, вкупно се увезени стоки во вредност од 112.862,3 милиони денари или 1,834 милијарди евра, што е за 4,9 отсто повеќе во споредба со истиот период од претходната година.
Со тоа трговскиот дефицит во првите два месеца од годинава изнесува 37.211,8 милиони денари или 604,7 милиони евра, а покриеноста на увозот со извоз е 67 отсто.
Според податоците на Државниот завод за статистика, најголемо учество во извозот имаат катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и други катализатори на носачи. Во увозот, пак, најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и електричната енергија.
Наш најголем трговски партнер е Германија, по што следат Велика Британија, Грција, Србија и Бугарија.
