Македонски
Во македонскиот Културно-информативен центар во Загреб вчеравечер беше претставен проектот „Мевлем“, којшто е уникатен спој на музика и поезија, создаден од композиторот и поет Марко Виденовиќ, а беше посветен на настраданите од Кочани.
Инструменталниот состав од Памела Велкова (виолина), Верица Ајтовска (виола), Енис Аљи (виолончело) и Марко Виденовиќ (пијано и глас) како совршен придружник на поетската содржина ѝ приреди на многубројната загрепска публика несекојдневна уметничка атмосфера преку изведбата на оригиналните композиции и поетски рецитации.
Пред концертот се обрати директорката на македонскиот КИЦ во Загреб, м-р Мими Ѓоргоска-Илиевска, која истакна дека „Мевлем“ ги промовира уникатните квалитети на камерното музицирање преку својата изведба и тематика, како културен феномен што ги поврзува музиката и поезијата, што претставува значаен чекор кон зајакнување на креативниот израз на македонските уметници на меѓународно ниво.
Многубројната публика од хрватската културна јавност, претставници на дипломатскиот кор, претставници на Советот за македонското национално малцинство за Град Загреб, како и претставници на многубројни локални и државни институции од Хрватска и од Македонија, уживаа во уникатната музичко-поетска вечер која беше проследена со громогласен аплауз.
