75 години ДФРМ – јубилеј заокружен со светски препознаени филмски дела: „Бубачки“ на Игор Иванов-Изи и „Медена земја“ на Тамара Котевска и Љубомир Стефанов во Кинотека

Крајот на јубилејната јулска програма ни носи два моќни филмови што го освоиле светот.

БУБАЧКИ (2004)

Режија: Игор Иванов – Изи | Продукција: “Сектор Филм“

Апсурдот на секојдневието во кинематографска форма. Петар е аутистично момче опседнато со бубачки, кое живее во сопствен свет – бегство од агресивниот татко и распаднатото семејство. Но суровата реалност продира и во неговата тишина. По низата настани, Петар се конфронтира со стварноста… и се одмаздува. Овој мрачен и прониклив краткометражен филм бил номиниран за „Златна мечка“ на престижниот Берлински филмски фестивал во 2004 година и е добитник на „Златен леопард“ на фестивалот во Локарно.

МЕДЕНА ЗЕМЈА (2019, документарен филм)

Режија: Тамара Котевска, Љубомир Стефанов| Продукција: „Аполо Медиа“, „Трис Филмс“

Првиот документарец во историјата на Оскарите номиниран во две категории – „Најдобар странски филм “ и „Најдобар документарен филм“. Приказна за Атиџе и пчелите, за припадноста на човекот кон природата и нарушување на природната рамнотежа преку судир на два различни начина на искористување на природните ресурси.

75 години ДФРМ – јубилеј заокружен со светски препознаени филмски дела.