Македонски
Турскиот претседател Реџеп Таип Ердоган и неговиот кинески колега Си Џинпинг на денешната средба разговараа за Средниот коридор и Иницијативата „Појас и пат“, како и за други регионални и глобални прашања, јави агенцијата Анадолија.
Средбата се одржа во рамките на дводневната посета на Ердоган на Кина каде ќе присуствува на 25-от состанок на Советот на шефови на држави на Шангајската организација за соработка (ШОС) во Тјанџин.
За време на состанокот, Ердоган рече дека е важно да се преземат заеднички чекори за усогласување на Средниот коридор и Иницијативата „Појас и пат“, соопшти Дирекцијата за комуникации на Турција на турската платформа за социјални медиуми NSosyal.
На состанокот е разговарано и за најновата ситуација во Газа, војната меѓу Русија и Украина и заедничките чекори кон развојот на Сирија.
Договорено е постојните механизми за консултации и соработка меѓу Турција и Кина да работат во редовни интервали.
Двајцата лидери разговараа и за економската соработка меѓу двете земји, при што Ердоган рече дека билатералната трговија треба да биде поддржана од инвестиции за да се обезбеди нејзин баланс и одржливост, соопшти Дирекцијата.
Истакнувајќи го големиот потенцијал во областите на дигиталните технологии, енергетиката, здравството и туризмот, турскиот претседател нагласи дека зголемената координација меѓу кинеските компании за инвестирање во Турција би била корисна во овој поглед.
Повторувајќи ја посветеноста на Анкара на политиката „една Кина“, Ердоган ја нагласи и стратешката димензија на билатералните односи.
