Македонски
Илјадници дански средношколци и студенти излегоа на улиците во Копенхаген за да протестираат против контроверзниот план на Владата за намалување, односно укинување на државните субвенции и финансиската подршка за младите.
Протестите се организираат бидејќи владините власти планираат да ги намалат овие буџетски средства со цел да обезбедат пари за зголемени воени издатоци и одбрана. Според податоците од Министерството за високо образование, се очекува околу 14.000 млади целосно да го изгубат правото на помош, додека за уште околу 8.000 студенти износот ќе биде намален.
Овој систем на државна поддршка во Данска постои повеќе од половина век, а новите мерки предизвикаа револт кај младите, кои порачуваат дека образованието и стандардот на студентите не смеат да бидат жртва на зголемените буџети за војската. Собирите се дел од поширокиот бран студентски протести што последните недели се шират низ европските земји.
