Македонски
На платото пред музичкиот салон „До ре ми“ во Скопје (кај Младинскиот културен центар) денеска во 12 часот ќе се одржи промоција на книгата Rock N‘ Beat од Михајло Грбевски-Мишко. Книгата ќе ја промовираат новинарите Тони Димков и Ненад Георгиевски, со музичка поддршка од Јаков Дренковски. Промоцијата е во рамките на манифестацијата Скопско лето.
Во Сули ан вечерва во 21 часот ќе биде одржан концертот „Хаус музика – 40 години љубов, ритам и еднаквост“.
Оваа година се навршуваат 40 години од препознавање на хаус музиката како засебен музички жанр, создаден раните 80-ти во Чикаго, САД. Во нашата клубска култура, овој жанр на музика е доминантен од самите почетоци, а денес е дел од програмата на секој простор каде се ангажира ди-џеј. Во рамките на овогодишното „Скопско лето“ тројца наши хаус ди-џеи, кои вредно работеле изминативе декади на популаризирање на оваа музика во клубовите, но и на медиуми, особено на радио и ТВ емисиите, ќе нè потсетат со забава на отворено на големото значење кое го има овој жанр музика низ декадите клубско живеење. Тоа се Јулијана Милутиновиќ, Зија Вишко и Зоки Бејбе, вели организаторот.
