Македонски
Во киното „Фросина“ во Младинскиот културен центар вечер од 20 часот ќе биде промовирано македонското издание на романот „Спиј сега, ајде, спиј сега“ од Имануел Мифсуд, наградуван автор од Малта.
Книгата низ разговор со авторот ќе ја претстави Јулијана Величковска, која воедно е и преведувач на романот од англиски јазик. Изданието е на ПНВ Публикации, а неговата објава е поддржана од Малтешкиот национален совет за книги.
Романот, главно, се занимава со сонот (и со неговото отсуство), но и со читањето, со сеќавањето… Поврзувајќи ги овие теми, во романот се појавуваат неколку љубовни приказни, со необични љубовни односи … Технички, романот има целосна намера да ги наруши сите книжевни правила на прозата – нараторот, кој (претпоставено) е и самиот автор, постојано вметнува и некои други приказни што не се дел од главната содржина на книгата, соопшти издавачот на романот.
Имануел Мифсуд (Малта, 1967) докторирал книжевност на Универзитетот во Малта, каде што предава современа литература и теорија на книжевноста. Тој е меѓу водечките автори на малтешката книжевна генерација по 1990-тите. Неговите книги се многу преведувани, особено романот „Во името на таткото (и на синот)“ – награден од Европската Унија и преведен на единаесет јазици. Мифсуд е автор и на две книги за деца.
Во 2014 година му бил доделен „Орден за заслуги“ од Република Малта како признание од државата за неговите книжевни потфати, а во 2024 година ја добил и Националната награда за поезија што ја доделува Малтешкиот национален совет за книги.
