Македонски
Министерот за надворешни работи Јошимаса Хајаши рече дека националната безбедност на Јапонија е главната причина поради која земјата нема да учествува како набљудувач на конференцијата, која почнува на 3 март во Њујорк.
Во остро безбедносно опкружување, нуклеарното одвраќање е од суштинско значење за одбрана на животите и имотот на луѓето, како и за суверенитетот и мирот на Јапонија, им рече Хајаши на новинарите.
Учеството на Јапонија на конференцијата како набљудувач би „испратило погрешна порака за јапонската политика (која го поддржува) нуклеарното одвраќање“ и би ги попречило нејзините „напори за безбедност, мир и сигурност“, рече тој.
Договорот на ОН за забрана на нуклеарно оружје беше одобрен во 2017 година и стапи во сила во 2021 година по повеќедецениска кампања чија цел беше да се спречи повторување на американските бомбардирања на Хирошима и Нагасаки на крајот на Втората светска војна.
Иако е единствената жртва на тие напади, Јапонија одби да го потпише Договорот, наведувајќи дека неговата цел е неодржлива без учество на која било од земјите што поседуваат нуклеарно оружје.
Јапонските власти рекоа дека ја споделуваат крајната цел – свет без нуклеарно оружје – но дека нивната земја треба да биде реална во услови на растечки глобални конфликти.
Преживеаните од атомските бомби и нивните поддржувачи ја критикуваа јапонската влада дека дава празни ветувања додека се држи до американскиот нуклеарен чадор.
