Македонски
Македонската уметница Марија Павловска учествува во престижна групна изложба на Европскиот културен центар во Италија, која е дел од 61. Уметничко биенале во Венеција. Павловска е претставена со делото „Билдинг XL“, кое е поставено во просторот „Палацо Мора“.
Европскиот културен центар (ECC) е домаќин на осмото издание на изложбата за современа уметност „Лични структури – Спојувања“ во Венеција, која ќе се одржи од 9 мај до 22 ноември 2026 година.
Изложбата „Лични структури – Спојувања“ ја продолжува мисијата на ECC за поттикнување на дијалогот меѓу меѓународните уметници, фокусирајќи се на темите за времето, просторот и постоењето. Во изложбата се вклучени 175 етаблирани уметници и нови гласови од повеќе од 40 земји. Во дијалог што ја одразува сложеноста на современата уметност, изложените дела ги предизвикуваат традиционалните граници и рамки, испреплетувајќи се во нови перспективи.
Марија Павловска е современа уметница, активна во првата половина на 21 век со две и пол децении континуирано присуство на европската современа уметничка сцена и активно присуство на меѓународно ниво во САД и Азија.
Нејзините уметнички дела опфаќаат теми на поларизација и глобализам, веќе препознатливи во интернационални рамки. Уметноста на Павловска, користејќи поларни црно-бели бои, е препознатлива, со специфичен експресивен стил што е уникатен, како во балканскиот регион, така и на меѓународно ниво.
