Македонски
Германскиот министер за одбрана Борис Писториус издаде остро предупредување дека изминатото лето „можеби било последното мирно“ за Европа, бидејќи процени дека можен конфликт меѓу НАТО и Русија може да се случи пред 2029 година. Изјавите предизвикаа непосредна реакција од Москва.
Писториус рече дека до неодамна, Германија и НАТО сметале дека е можен руски напад врз Алијансата од 2029 година па натаму, но поновите проценки зборуваат за можна ескалација веќе во 2028 година.
„Некои воени историчари веруваат дека веќе го доживеавме последното мирно лето“, рече тој.
Германскиот министер нагласи дека земјите од НАТО итно треба да се модернизираат и вооружат, истакнувајќи дека Германија веќе е во фаза на подготовка. Од 2027 година, граѓаните ќе бидат подложени на медицински прегледи за да се идентификуваат потенцијални идни резервисти во случај на вонредна состојба, додека владата планира да создаде големи резервни сили за зајакнување на одбраната на земјата.
Канцеларот Фридрих Мерц изјави дека негова цел е Бундесверот да стане најсилната воена сила во Европа. Писториус, исто така, посочи дека, доколку Германија биде нападната, таа е подготвена „да убива руски војници“. Според него, мирот може да се обезбеди само со сила и подготвеност за одбрана, став што го одразува зацврстувањето на ставот на Германија кон Москва.
-По овие изјави, немаме сомнение за тоа кој дејствува како агресор – одговори Москва.
Портпаролката на руското Министерство за надворешни работи, Марија Захарова, реагираше на изјавите на Писториус, тврдејќи во изјава за агенцијата ТАСС дека „по овие зборови нема сомнение за тоа кој дејствува како агресор“. Москва беше особено критична кон извештаите за непосреден конфликт, обвинувајќи ја Германија за агресивна реторика.
Изјавите на Писториус се дел од интервјуто што го даде на 15 ноември за „Франкфуртер алгемајне цајтунг“ , каде што германскиот министер тврдеше дека ризикот од војна не е теоретски, туку бара подготовка и решителност од државите на Алијансата. Како што истакна, НАТО има значајни капацитети за одвраќање, вклучително и нуклеарно оружје, што – според него – придонесува за одржување на стабилноста, и покрај зголемувањето на тензиите.
