Македонски
Поддршката за членството на Украина во Европската унија во следните неколку години е намалена во земјите-членки на блокот, додека мнозинството Украинци сè уште го поддржуваат забрзаниот пристап, покажаа резултатите од анкетата на фондацијата Бертелсман (Bertelsmann), објави германската агенција dpa.
Околу 83 проценти од Украинците сакаат нивната земја да се приклучи на ЕУ во следните неколку години, што го поддржуваат само 47 отсто од граѓаните на Унијата, покажа анкетата.
Мнозинството граѓани на ЕУ, односно 53 отсто од нив, се противат на забрзаниот процес на пристапување.
Германија, која ѝ обезбедува на Украина поголема воена и финансиска поддршка од која и да е друга земја во Европа, е една од најскептичните од десетте најголеми членки на 27-члениот блок.
Само 41 отсто од Германците го поддржуваат евентуалното членство на Украина. Само Романија има помал показател – од 40 отсто.
Шведска има највисоко ниво на поддршка меѓу најголемите членки, од 69 отсто.
На почетокот на руската инвазија во 2022 година, 60 отсто од Германците го поддржуваа забрзаниот процес на пристапување за Украина.
Фондацијата редовно го повторуваше истражувањето и забележа дека поддршката оттогаш опадна и во поединечните земји и низ целата Унија.
Членството на Украина останува официјална цел на ЕУ и се смета за основа на идниот безбедносен поредок на Европа.
Премостувањето меѓу таа цел и јавното мислење ќе бара подлабок дијалог меѓу политичките челници и граѓаните, забележува фондацијата, додавајќи дека стратешката важност на интеграцијата на Украина треба да се комуницира поубедливо.
Анкетата беше спроведена во јуни на репрезентативен примерок од 16.795 луѓе во сите земји-членки.
