Македонски
Децата кои растат на фарми, особено оние кои се во близок контакт со добиток, поретко развиваат алергии и астма. Ново меѓународно истражување открива дека одредени микроорганизми од таквата средина би можеле да имаат важна улога во овој заштитен ефект.
Истражувањето го спровел меѓународен тим предводен од експерти од клиниката LMU и истражувачкиот центар Helmholtz Munich. Научниците анализирале повеќе од 1.000 деца и различни примероци од нивната околина.
Имунитетот добива „тренинг“ уште од детството
Наодите се вклопуваат во таканаречената хигиенска хипотеза, според која имунолошкиот систем во раното детство има потреба од контакт со разновидни микроорганизми.
Децата кои растат на фарми секојдневно се изложени на многу повеќе микроорганизми отколку децата кои живеат во урбана средина. Тој контакт би можел да му помогне на имунолошкиот систем подобро да разликува безопасни од потенцијално штетни материи.
Истражувачите анализирале брисеви од носот, прашина од душеците и примероци од шталите на 47 фарми. Со генетски анализи и други лабораториски методи се обиделе да утврдат кои микроорганизми би можеле да имаат заштитна улога.
Издвоиле две бактерии – Romboutsia timonensis и Glutamicibacter arilaitensis. Тие се поврзани со дигестивниот систем на кравите и произведуваат супстанции кои се присутни во воздухот во шталите.
Според истражувачите, преку вдишување овие супстанции можат да дојдат во контакт со рецепторите во дишните патишта и да влијаат врз имунолошките реакции. Тоа би можело да помогне во намалување на ризикот од одредени алергиски заболувања и астма.
Научниците сепак нагласуваат дека се потребни дополнителни истражувања пред овие сознанија да можат да се претворат во конкретна терапија. Идејата во иднина би била да се имитира природниот заштитен ефект на фармерската средина без децата навистина да мора да живеат во такви услови.
