Македонски
Ако сте пораснале во поранешна Југославија, речиси е невозможно да не сте слушнале за карминот број 17 на „Саманта“. Тој беше повеќе од само шминка – беше симбол на едно време, мал луксуз што го најде својот пат во чантите, несесерите и кутиите за мејкап.
Карминот број 17 на „Саманта“ беше препознатлив по својата нежна розова нијанса со бисерен сјај – совршен одраз на естетиката на 80-тите, кога се носеа тапирани фризури, огромни обетки и шарени јакни.
Неговата боја имаше допир на нежност, поради што беше првиот кармин по избор за многу тинејџерки, но исто така доволно гламурозен за возрасни жени да го носат на вечерни излегувања.
Исто така, често се користеше како руменило, лесно се нанесуваше на образите за свеж изглед, а не беше невообичаено да се нанесе на очните капаци како кремаста сенка за очи во истата нијанса.
За разлика од увезените, скапи кармини кои беа тешко достапни, „Саманта“ беше достапна за сите. Се продаваше во козметичките оддели на продавниците и аптеките, а сепак носеше допир на нешто посебно – зборот Лукс беше напишан на пакувањето, а црната елегантна кутија со карактеристичниот цвет даваше чувство дека држите нешто рафинирано во раката.
Оние што го користеа го паметат по сè – по неговиот специфичен, малку пудрест мирис, по неговата кремаста, но интензивна текстура и по тој посебен момент кога ќе го извадите пред огледалото, подготвни за излегување.
„Саманта“ 17 не беше само кармин, туку беше ритуал.
Неговата моќ не беше само во бојата, туку и во емоцијата што ја предизвикуваше. Тоа беше кармин што ѝ припаѓаше на секоја генерација – од невести кои го носеа на своите свадби, до тинејџерки кои тајно ги пробуваа кармините на своите мајки.
Затоа „Саманта“ 17 е повеќе од само козметички производ. Тоа е симбол на 80-тите, потсетник на една поедноставна, но гламурозна ера и доказ дека понекогаш еден мал предмет може да носи цела генерација во себе.
