Македонски
Иако маријачите се далеку од нас десетици илјади километри, мексиканската храна може да ни биде на дофат на рацете! Ви претставуваме автентични рецепти за приготвување оригинален такос.
САЛСА ГВАКАМОЛЕ
ПОТРЕБНО:
2 авокада
1 домат
½ кромид
сок од лимон
½ врзоп коријандер
сол, црн пипер
Приготвување: изблендирајте го исчистеното авокадо со стапчест миксер или испасирајте го со виљушка, додајте ситно сечкан кромид, домат, сок од еден лимон, коријандер и зачини. Измешајте и послужете со начос или со чипс.
Екстра-совет: доколку сте за чили-верзија, додајте сечкано луто пиперче.
КЕСАДИЈА-БИФТЕК
За 4 лица
Состојки:
4 тортилји
600 г јунешки стек
400 г гауда
Приготвување: исечкајте го месото на тенки ленти и печете го во загреана тава. Поделете ги месото и сирењето на 4 еднакви дела и подгответе ја секоја порција посебно. Ставете го кашкавалот да се растопи во тава на оган и додајте го печеното месо. Кога ќе се запече, поклопете со тортилја. Завртете ја тортилјата со помош на шпатула, преклопете ја на половина и оставете ја да се запече од двете страни. Сервирајте со гватамоле-сос.
ТАКОС АЛПАСТОР
За 4 лица
Состојки:
600 г свинско каре
12 мали тортилји
За маринада:
½ кромид
3 чешниња лук
½ портокал
3 парчиња ананас
сол, црн пипер, каранфилче
½ супена лажица шеќер
½ супена лажица ал-пипер
врзоп коријандер
Приготвување: исчистете го месото од жиличките и исечете го на тенки ленти. Изблендирајте половина од состојките за маринада, додајте ги преостанатите состојки и маринирајте го месото (претходно исчистено и исечено на тенки лентички). Оставете да отстои 2 часа. Потоа, печете го 2 минути во тава, па префрлете го врз загреана тортилја и додајте ситно исечкан кромид и коријандер. Пред консумирањето, исцедете парче портокал.
Извор: Убавина и здравје
