Македонски
Овие меки компирови кнедли со сочна слива во средината, валкани во миризливи пржени лебни трошки и посипани со шеќер се едноставен, домашен и неодолив десерт.
Потребни состојки за кнедлите:
- 1 кг компири
- прстофат сол
- 150 г брашно
- 1 жолчка
- малку масло, путер или маргарин – по желба
За полнење:
- 20 зрели сливи
За валкање:
- 100–150 г шеќер во прав
- 150 г лебни трошки
- 1-2 лажица путер
- цимет
Подготовка:
Компирите излупете ги, исечете ги на парчиња, ставете ги во тенџере, прелијте ги со ладна вода и сварете ги додека омекнат. Сварените компири испасирајте ги додека се уште се топли и оставете ги малку да се изладат.
Во меѓувреме, извадете ги семките од сливите. Во изладените пасирани компири додајте ја жолчката, солта и брашното. Додавајте го брашното постепено. Тестото е лепливо, не треба да се додава повеќе брашно зошто ќе бидат тврди кога ќе се зготват. Од тестото земајте помали делови и со набрашнети раце развлечете ги на дланката. Во средината ставете една слива и внимателно затворете го тестото околу неа, обликувајќи топка.
Во поголемо тенџере ставете вода со малку сол и оставете ја да зоврие. Намалете ја температурата и внимателно спуштајте ги кнедлите во водата, не ставајте премногу, не треба да се допираат кога ќе се варат. Кога кнедлите ќе испливаат на површината, варете ги уште 1–2 минути, а потоа извадете ги со решеткаста лажица.
Во широка тава стопете путер и пропржете ги лебните трошки додека добијат златно-кафеава боја. Варените кнедли внимателно ставете ги во тавата со лебните трошки и нежно протресете ја тавата за убаво да се обложат. На крај, посипете ги со шеќер во прав и цимет, па послужете ги топли.
