Македонски
Претседателката на Хондурас, Ксиомара Кастро, изјави дека се подготвува државен удар против нејзината влада.
Според неа, поранешниот претседател Хуан Орландо Хернандез, кој неодамна беше помилуван од американскиот претседател Доналд Трамп, планира да се врати во земјата за да го прогласи победникот на спорните претседателски избори пред да бидат објавени официјалните резултати.
Врз основа на потврдени разузнавачки информации, се спроведува агресија со цел соборување на уставниот и демократскиот поредок преку државен удар против мојата влада“, напиша Кастро на социјалните медиуми, апелирајќи до народот, социјалните движења и граѓаните итно и мирно да се соберат во главниот град за да го заштитат мандатот на народот и да го отфрлат секој обид за државен удар.
Началникот на Генералштабот на вооружените сили на Хондурас, генерал Рузвелт Хернандез, од друга страна, вети дека армијата ќе и остане лојална на Кастро.
Ние гарантираме стабилност. Владата ќе работи до 27 јануари 2026 година и ние го следиме демократскиот трансфер на власта. Нема да има државен удар“, порача генералот.
Самиот Хернандез категорично ги негира обвинувањата на Кастро, нарекувајќи ги „целосно лажни“. Тој вели дека нема планови да се врати во земјата и дека овие изјави само „шират паника и создаваат хаос“.
Слична ситуација се случи во 2009 година, кога беше извршен воен удар против претседателот Мануел Зелаја, кој е сопруг на сегашната претседателка. Зелаја потоа беше изнесен од земјата од страна на војската, а ударот предизвика осуда од светската заедница.
На 30 ноември во Хондурас се одржаа претседателски избори, но земјата сè уште не знае кој победил. Според прелиминарните резултати, конзервативниот кандидат Насри Асфура од Националната партија води со 41% од гласовите, по него следува Салвадор Насрала од Либералната партија со 39%, а кандидатот на владејачката левичарска партија ЛИБРА, Рикси Монкада, има само 20%.
Сепак, разликата меѓу лидерите е помала од 50 илјади гласови, а околу 15% од изборните протоколи содржат противречности доволни за да го променат резултатот од изборите.
Претходно, американскиот претседател Доналд Трамп порача дека сите мора да гласаат за Асфура или лоши работи ќе му се случат на Хондурас.
