Македонски
Поради почетокот на примената на новите високи царини од страна на САД, мултинационалниот конзорциум на производители на автомобили „Стелантис“ од 7 април на две недели ќе затвори една од своите три фабрики во Канада, фабриката на својата марка „Крајслер“ во Виндзор.
Таа фабрика на „Крајслер“, која наскоро ќе наполни 100 години, го произведува минивенот „Крајслер Пацифик“ и електрични автомобили „Доџ Чарџер“, кои масовно се извезуваат во САД.
Затворањето на фабриката во Виндзор, во која работат околу 4.000 луѓе, во голема мера е поврзано со царините што ги објави американскиот претседател Доналд Трамп за автомобили увезени во САД, соопшти синдикатот.
Тоа е една од активностите што мора веднаш да ги преземеме за да го приспособиме производството, потврди портпаролот на компанијата.
Претставниците на синдикатот во пораката велат дека привременото затворање на фабриката ќе ги опфати и производителите на делови што се испраќаат во фабриката во Виндзор, јавуваат канадските медиуми.
Неколку илјади работници ќе бидат погодени од ова привремено затворање потребно за да се процени влијанието на царините“, рече националната претседателка на синдикатот Унифор, Лана Пејн.
Трамп најави дека денеска ќе стапи во сила царината од 25 отсто за возилата и лесните камиони што се увезуваат во САД. Синоќа најави и воведување сеопфатни царини, особено за азиските земји и ЕУ.
Тој вчера воведе рамномерни царински тарифи за сите стоки и услуги по земја, за разлика од претходните четири типа американски царини кои зависеа од видот/вредноста на стоката и царинските аранжмани со други земји: специјални царински тарифи, композитни тарифи, „ad valorem“ (по вредност) и царинска квота.
