Македонски
Полска вечерва собори дрон над владина зграда во Варшава. Безбедносните службеници „неутрализираа“ дрон над владини згради во центарот на Варшава, а двајца белоруски државјани се приведени, изјави полскиот премиер Доналд Туск, во услови на зголемени регионални тензии по неодамнешните нарушувања на воздушниот простор.
„Службата за државна безбедност штотуку неутрализираше дрон што дејствуваше над владини згради (Улицата Паркова) и Белведере“, објави Туск на платформата X.
Палатата Белведере е една од официјалните резиденции на полскиот претседател.
„Двајца белоруски државјани се уапсени. Полицијата истражува“, додаде Туск.
Тој не даде дополнителни детали.
Инцидентот се случува откако бран руски беспилотни летала влегоа во полскиот воздушен простор во невиден голем упад минатата среда. Прекршувањата доведоа до соборување на руски цели од страна на западни авиони за прв пат за време на конфликтот во Украина и предизвикаа нови стравувања во регионот кој е напнат откако Москва ја започна својата војна во 2022 година.
Улицата Паркова во полскиот главен град е во област каде што се наоѓаат владини згради, Палатата Белведере и странски амбасади. Руската амбасада е исто така во близина. Областа е прогласена за зона забранета за летање на дронови освен ако операторите не добијат дозвола, а прекршоците се казнуваат со затвор до пет години, според официјалната веб-страница на Градското собрание на Варшава.
