Македонски
Странското мешање во избори е реална закана, но понекогаш се користи како алиби од страна на демократските држави за да се оттргне вниманието од внатрешни проблеми, изјави генералниот секретар на меѓувладината организација „Интернешнл ИДЕА“, Кевин Касас-Замора.
Во извештајот на оваа организација со седиште во Стокхолм, која е аналитички центар за поддршка на демократијата, се наведува дека дезинформациите и манипулациите со алгоритмите на социјалните мрежи за влијание врз изборните резултати се меѓу најсериозните закани за демократиите во текот на изборните кампањи.
Овие закани се влошуваат поради „јавната намера на државни актери, странски и недржавни субјекти да преземаат вакви активности“, се нагласува во извештајот.
Од 54 изборни процеси што „Интернешнл ИДЕА“ ги следела во 2024 година, кај 80 отсто се регистрирани „намерни обиди и кампањи за дезинформација со цел влијание врз резултатите“, изјави Касас-Замора.
Но, според него, прекумерната употреба на темата за странско мешање носи ризик да се пренасочи вниманието од вистинските предизвици со кои се соочуваат демократиите.
Претераното инсистирање на странското мешање станува вид алиби – удобно оправдување за националните политички субјекти да не ја преземат одговорноста за тоа да размислат повторно како функционира демократијата и како да ѝ се овозможи да одговори на очекувањата на граѓаните. Доколку навистина се грижиме за иднината на демократијата, итно е потребно внатрешно да ја преиспитаме и да ги надминеме нејзините слабости, кои ја поткопуваат довербата на граѓаните во политичките институции, додаде тој.
Во 2024 година, околу 1,6 милијарди луѓе гласале на 74 национални избори низ светот – што, според извештајот, сведочи за силната желба гласот на граѓаните да се чуе, иако довербата во политиката станува сѐ поретка.
Она што е навистина интересно е дека главниот извор на недоверба во политичките институции е токму неуспехот на државата во распределбата и обезбедувањето на јавни добра и услуги, објаснува поранешниот министер на Костарика. – Тоа е клучниот фактор што ги обликува односите меѓу граѓаните и локалните институции, додаде тој.
Според податоците на „Интернешнл ИДЕА“, околу 40 отсто од изборите одржани во 2024 година биле предмет на различни форми на оспорување поради недоверба во резултатите – од бојкоти до неприфаќање на резултатите од страна на одредени политички партии.
