Македонски
Финска, членка на НАТО, ја заврши изградбата на оградата долга 200 километри долж границата со Русија по две години работа, објавија финските власти. „Најважната задача на државата е да ја обезбеди безбедноста на своите граѓани“, изјави финската министерка за внатрешни работи Мари Рантанен.
„Во овие непредвидливи времиња, оградата на источната граница е клучна компонента на ефикасен систем за безбедност на границите“, додаде таа. Изградбата почна во август 2024 година долж делови од финско-руската граница, која е вкупно долга повеќе од 1.300 километри, на места каде што финската гранична полиција проценила дека „оперативната потреба била најголема, а изградбата била економски најисплатлива“.
Бариерата се состои од ограда висока околу 4,5 метри и систем за технички надзор. Тензиите по должината на финско-руската граница нагло се зголемија од почетокот на конфликтот во Украина во 2022 година.
Финска ги затвори своите копнени гранични премини со Русија во декември 2023 година, откако ја обвини Москва за намерно насочување на мигрантите кон границата со цел дестабилизација на земјата.
Русија ги негира обвинувањата. „Без ограда на границата, не е можно ефикасно, веродостојно и безбедно да се бориме против оваа злоупотреба на миграцијата“, кажа Марку Хасинен од финската гранична стража.
