Македонски
Синоќа во Велгошти во организација на Општина Охрид се одржа традиционалната манифестација „Вечер на Чинго“ посветена на големиот македонски раскажувач Живко Чинго.
Настанот го отвори заменик – градоначалникот Ана Крстеска, а беседа за Чинго одржа проф. д-р Кристина Николовска.
На Дијана Петрова, авторката на најдобриот расказ од Конкурсот „Живко Чинго“ симболично и беше врачена наградата за расказот „Мизенабим“.
Настанот помина во знакот на 90 годишнината од неговото раѓањето и по тој повод беше промовирана книгата „Наградата Живко Чинго – од востановувањето до денес“ дело на приредувачот – колегата Милчо Јованоски. Издавач е Општина Охрид.
Книгата е книжевна ретроспектива на збиднувањата поврзани со културната манифестација „Вечер на Чинго“. Низ страниците на овој вреден и значаен книжевен запис на м-р Јованоски ќе имате единствена и ретка можност да се запознаете со почетоците на културната манифестација „Вечер на Чинго“; нејзиното прекинување и нејзиното продолжување; да ги прочитате сите досегашни првонаградени раскази и имињата на нивните автори; да се потсетите на некоја од генијалните мисли или реплики од безвременските дела на Чинго и да го прочитате интервјуто со неговата внука, д-р Виолета Ачкоска под наслов „Чинго, берач на туѓи гајлиња“.
Пред споменикот на Чинго во атарот на црквата Св. Петка се поклонија и положија букети цвеќе бројни делагации. Меѓу нив беше и делегацијата на НУ Библиотека „Григор Прличев“ во која беа Весна Симоноска, Илија Џајкоски и Милчо Јованоски.
