Македонски
На 31 август пред бројни домашни и странски македонисти и љубители на поетската реч, во Конгресниот центар во Охрид се одржа раскошна промоција на книгата ,,Граматика на љубовта / Gramatika lásky” од Тихомир Јанчовски. Се работи за двојазично (македонско-словачко) луксузно издание, објавено во издавачката куќа “Slovenské dejiny” од Будмерице во 2026 година. Автор на словачкиот превод и на поговорот на книгата е проф. д-р Звонко Танески, а јазичната редакција на словачкиот текст е дело на м-р Моника Нецпалова. Книгата е збогатена со мошне инспиративни тематски илустрации направени од страна на Грета Федора Хомзова, а на крајот од книгата е поместена и ,,епитафна песна” од Мартин Хомза, посветена на неговиот пријател и прерано починат голем македонски поет Тихомир Јанчовски. За ова ново и драгоцено издание, како и за спецификите и за значењето на целокупното поетско творештво на Јанчовски во македонскиот културен контекст, ингениозно зборуваше промоторката проф. д-р Елизабета Шелева, најдобриот познавач на стилските принципи на неговата поетска стратегија за која професорката Шелева, пишувајќи за нив и претходно, изрази посебен респект и препорака за уште потемелен прочит на поетскиот дискурс на Јанчовски во иднина.
На промоцијата, сјајно беа интерпретирани неколку песни од Тихомир Јанчовски, на македонски и на словачки јазик од страна на проф. Шелева и м-р Нецпалова.
Следната промоција на изданието се планира наскоро и во Лекторатот по македонски јазик, литература и култура на Филозофскиот факултетот при Универзитетот “Константин Филозоф” во Нитра.
Промоцијата беше збогатена со извонредна и незаборавна интерпретација на поезијата од страна на м-р Моника Нецпалпва, семинаристка од Словачка и со маестрална музичка изведба на гитара, вдахновена од песните на Јанчовски, од страна на семинаристот Мануел Торес од Аргентина.
