Македонски
На 88-годишна возраст вчера почина познатата француска актерка Марина Влади, соопшти семејството.
Актерката беше една од истакнатите личности на италијанската и француската кинематографија, а кариерата ја започна со филмот „Пред потопот“ (Avant le déluge) на Андре Кајат од 1954 година, за чија улога ја доби наградата „Сузан Бјанке“ (Suzanne Bianchetti).Влади се појави и во неколку филмови на режисерот Робер Осен со кој тогаш беше во брак. Освен како актерка, успех постигна и како пејачка, објавувајќи заедно со сестрите два албума под уметничкото име „Сестрите Полијаков“ (Les Sœurs Poliakoff).
Во 1969 година се омажи за рускиот пејач и поет Владимир Висоцки на кого му ја посвети книгата „Владимир или запрениот лет“, објавена во 1987 година, која подоцна доби театарска адаптација. Актерката има објавено десетина книги, меѓу кои и нејзините мемоари „24 слики во секунда“, објавени во 2005 година.
Освен во авторски филмови, во текот на 70-тите играше и во популарни комедии, меѓу кои и „Сите се убави, сите се љубезни“ на Жан Јан и „Нека започне прославата“ на Бертран Таверние. Во текот на својот живот беше позната и преку својот активизам, борејќи се за човечките права.
