Македонски
Синоќа претставници од Агенцијата за филм, заедно со в.д. директорот г. Сашко Мицевски, присуствуваа на снимањето на новиот филм „Збогум Копакабано“ во режија на Милчо Манчевски, а во продукција на Банана филм. Снимањето се одвиваше во уникатниот амбиент на Даут-пашиниот амам, во Старата скопска чаршија, како дел од 15-тиот ден од продукцијата што се реализира на различни локации во и околу Скопје.
Филмот, кој ќе продолжи да се снима и во следните недели, обработува теми од длабок емотивен и општествен карактер – од сестринска љубов, преку самотија и ментално здравје, до корупција и социјални нееднаквости. Иако сместен во современа Македонија, филмот носи и универзална порака за човечките односи и борбата за достоинствен живот.
На сетот беа присутни и претставници на медиумите, кои имаа можност да присуствуваат на дел од снимањето и да се запознаат со текот на продукцискиот процес.
Филмот се реализира со поддршка од Агенцијата за филм, како и со учество на национални филмски фондови и приватни партнери од Бугарија, Србија, Албанија, Италија и Велика Британија. Продуцент е Јане Ќортошев.
Во актерската екипа се вклучени: Сара Климоска, Филип Трајковиќ, Соња Михајлова, Петар Мирчевски, Јордан Симонов, Дејан Лилиќ, Јасмина Василева, Стефан Николовски, Калина Наумовска, Ана Костовска, Виктор Арсов и други.
Сара Климоска го толкува комплексниот лик на Малина, која со својата емотивна длабочина и слоевитост ја носи главната приказна. Нејзината улога ги отсликува сите предизвици и размислувања што ги носи животот. Филип Трајковиќ ја игра улогата на Виктор, братот на Малина, човек со интелектуална попреченост, чие присуство во филмот дополнително го продлабочува емотивниот и општествен контекст на приказната.
Филмската екипа е составена од професионалци со богато домашно и меѓународно искуство, меѓу кои се Дејвид Манс (дизајн на продукција) и Стефано Фаливене (директор на фотографија), како и истакнатите македонски авторки Жаклина Крстевска (костимографија), Бистра Кечиџиева (шминка) и Милка Анчевска (кастинг).
Посакуваме успешна и непречена реализација на преостанатите активности и продуктивен завршеток на проектот.
Фото: Јасна Чилиманова Накова
