Македонски
Вагиналните инфекции стануваат многу почести во текот на топлите месеци, а причината за ова лежи во зголемената влажност, потењето, престојот во влажни костими за капење и честата употреба на вода од базен. Заедно, овие фактори ја нарушуваат природната рамнотежа на вагиналната флора, правејќи ја поподложна на габични, бактериски или паразитски инфекции.
Најчестите летни вагинални инфекции
Без разлика дали планирате одмор, викенд на базен или едноставно носите тесна, синтетичка облека во текот на топлите денови – важно е да знаете како да ги препознаете првите симптоми на вагинална инфекција и како да ги спречите на време. Подолу, дознаваме кои се најчестите летни вагинални инфекции, како изгледаат нивните симптоми и што можете да направите за да го зачувате вашето интимно здравје за време на сезоната на сончање и уживање.
Габична инфекција (кандидијаза)
Една од најчестите инфекции во текот на летото е габична инфекција предизвикана од габата Candida albicans. Влажна и топла средина го фаворизира нејзиното прекумерно размножување. Типични симптоми вклучуваат густ, бел исцедок (често опишан како сирест), чешање, црвенило и печење во вагината.
Бактериска вагиноза
За разлика од кандидијазата, бактериската вагиноза е предизвикана од нарушена рамнотежа на добри и лоши бактерии во вагината. Чести предизвикувачи во текот на летото можат да бидат сапуни со силни мириси, често плакнење и поминување време во базени со хлорирана вода. Симптомите вклучуваат сив или белузлав исцедок со непријатен мирис (сличен на мирисот на риба), без изразено чешање.
Трихомонијаза
Ова е сексуално пренослива инфекција предизвикана од паразитот Trichomonas vaginalis. Иако најчесто се пренесува сексуално, може да се појави и преку контакт со заразени крпи или влажни површини. Симптомите вклучуваат жолто-зелен исцедок, непријатен мирис, чешање и болка при мокрење или сексуален однос.
Како да ги препознаете симптомите на вагинална инфекција?
Вообичаени симптоми за повеќето вагинални инфекции вклучуваат:
Промена на изгледот, бојата или мирисот на вагиналниот исцедок
Чешање и чувство на печење
Црвенило, оток или непријатност
Болка за време на сексуален однос или мокрење
Доколку ги забележите овие симптоми, важно е да не се самолекувате, туку да се консултирате со гинеколог за да добиете точна дијагноза и соодветен третман.
Совети за превенција
Соблечете го мокриот костим за капење штом ќе завршите со пливање
Носете памучна долна облека
Избегнувајте агресивни сапуни
Не користете туѓи крпи или костими за капење
Одржувајте добра интимна хигиена – но без претерување
По базенот или морето, обавезно истуширајте се со чиста вода
Летните месеци можат да бидат релаксирачки и полни со уживање, но со малку внимание и соодветна грижа, лесно можете да избегнете непријатности како што се вагиналните инфекции и да го зачувате вашето интимно здравје.
Извор: Убавина и здравје
