Македонски
Во текот на минатите две недели, царинските службеници открија неколку обиди за криумчарење разна стока, при што привремено се задржани златен и сребрен накит, опрема и средства за тетовирање, цигари, тутун, моторцикл, делови за прозорци и фалсификувана стока.
ЦАРИНСКА УПРАВА: СПРЕЧЕНИ ОБИДИ ЗА ШВЕРЦ НА ЗЛАТЕН И СРЕБРЕН НАКИТ, ЦИГАРИ И ТУТУН, НАД 5 ИЛЈАДИ АЛАТКИ ЗА ТЕТОВИРАЊЕ, МОТОРЦИКЛ, ФАЛСИФИКАТИ И ДРУГО
• При контрола на автобус на граничниот премин Деве Баир на влез во државата кај патничка од Косово пронајдена е поголема количина на златен накит. Во патна торба, во кутија завиткана во пластична ќеса царинските службеници открија златни монети, ланчиња, брош, огрлица, обетки и др.
Стоката е привремено задржана, а против лицето е поднесена кривична пријава.
• Царински службеници на граничниот премин Блаце при контрола на автомобил открија поголема количина на сребрен накит и накит од челик (бижутерија). Накитот е пронајден во патните торби на еден од патниците кои се превезувале во возило со бугарски регистарски таблички. Вредноста на накитот изнесува околу 186 илјади денари, а против сторителите е поднесена прекршочна пријава.
•Царински службеници во Царинската испостава Струмица запленија моторцикл Априлиа откако по поднесената увозна декларација со сите пропратни документи било увидено дека се работи за друг моторцикл за кој увозникот не поседувал никаков документ. Против сторителот е покрената прекршочна постапка.
•Службата за мобилни скенери при контрола на товарно моторно возило управувано од македонски државјанин заплени 5.476 парчиња игли, мастила, и други алатки за тетовирање за коишто возачот не поседувал никаква документација. Стоката е откриена во четири пакети кои се наоѓале во кабината на возилото на горниот кревет за кои возачот изјавил дека не поседува увозна документација.
•18 штеки цигари без акцизни маркички и 20 кутии тутун од по 30г и 50г, се откриени на Меѓународниот Аеродром Скопје, при рентген контрола на чекиран багаж на патник кој имал намера да отпатува со лет за Лондон. Непријавените кутии цигари се пронајдени кај македонски државјанин кој со себе носел само бугарски пасош. Непријавените цигари се запленети, а против патникот ќе биде поведена прекршочна постапка.
•Царински службеници во два случаи запленија 56 штеки и дополнително уште 9 кутии цигари.
Еден од случаите е откриен во соработка со МВР, при што запленети се 44 штеки цигари и 9 кутии цигари без акцизни маркички, пронајдени во близина на граничната линија сокриени во грмушки.
Во вториот случај, запленети се 12 штеки цигари откриени во товарно моторно возило товарено со стока пријавена за увозно царинење.
• Мобилни царински тимови на влез во државава на граничниот премин Богородица, во багажникот на автомобил открија 238 разни производи (штитници за колена, делови за автомобили, депилатори, играчки, организери за шминки, пили со ланец, соларни рефлектори, алат и друго).
• 5.000 пластични делови за прозорци се пронајдени во две картонски кутии сместени на горниот кревет во кабината на камион со албански регистарски таблички, управуван од албански државјанин кој се пријавил за влез во државата на граничниот премин Деве Баир.
• 3.755 пара детски сандали, 64 колички и 24 детски велосипеди, со ознаки на заштитени трговски марки се откриени од страна на мобилните царински тимови на излез од државата на граничниот премин Блаце. Стоката е пронајдена при контрола на контејнер натоварен на камион со косовски регистарски таблички. Поради сомневање дека производите повредуваат права од интелектуална сопственост, истите се привремено задржани и поведена е постапка за утврдување на нивната оригиналност.
•На граничниот премин Богородица откриен е обид за користење на фалсификувана лиценца за вршење на јавен превоз во меѓународниот патен сообраќај. Имено, македонски државјанин како возач на камион со македонски регистарски таблички, при влез во државата приложил Извод од лиценца за вршење на јавен превоз во меѓународниот патен сообраќај, издаден на неважечки образец. Покрај тоа возачот не поседувал сертификат за професионална компетентност за учество во меѓународен превоз на патници и стоки.
Случајот е предаден на Секторот за контрола и истраги за понатамошна постапка.
