Македонски
Во салонот 19:19 во Културно Информативниот Центар во Скопје, вечерва со почеток во 19:00 часот ќе биде отворена изложбата Изложба Photo Graz selection VI (Current Positions of Styrian Photography). По изложбата следува концерт на познатата австриска харфистка Моника Штадлер.
Грац, вториот најголем град во Австрија, од 1950-тите години наваму се развива во центар за продукција и комуникација на прогресивната фотографија. Оваа традиција продолжува и денес и претставува основа за исклучителната големина и разновидност на оваа фотографска сцена. photo graz selection VI претставува избор од 25 авторски фотографии кои ја покажуваат живоста, современоста и разноликоста на оваа сцена.
65 години ги делат најстариот (*1940) и најмладиот уметник (*2005) во оваа изложба. За тој период, не се промениле само техничките услови за фотографирање. Општествените и геополитичките случувања исто така внеле нови теми во фокусот на уметничкото истражување. Темите кои ги опфаќа изложбата се однесуваат на самопретставување, идентитет и сликата на жената, како и на широк спектар на актуелни општествено-политички и културни прашања – климатски промени, миграција, родови аспекти итн. Техники од старото доба на фотографијата – камера обскура, соларна фотографија, стереоскопија, фотограм – се среќаваат со слики кои критички се осврнуваат на вештачката интелигенција. Изложбата нуди можност за позиционирање во рамките на разновидните пристапи и мисловни правци кои го карактеризираат овој медиум.
Уметници:
Joerg Auzinger, Elsbeth Ebenberger, Nici Eberl, Michael Goldgruber, GUKUBI MATO, Anja Harrer, Klaus-Dieter Hartl, Lisa Hopf, Anna Jocham, Ulrike Königshofer, Branko Lenart, Evelyn Loschy, Lisa Maier, Maryam Mohammadi, Andrea Mühlbacher, Gerburg Neunteufl Pipina Schickaneder, Bernd Oberdorfer, Nora Obergeschwandner, Manfred Pichler, Hermann Ploder, Arnold Reinisch, Gerlinde Schefzik, Kia Sciarrone, Reinhard Sock, Elisa Wüntscher.
Куратор: Герхард Грос
