Македонски
Во болницата во Литванија почина пациент кој настрада во пожарот во Кочани. Тој е 60-та жртва во трагедијата која се случи на 16 март во дискотеката „Пулс“. Информацијата за „Република“ ја потврди д-р Игор Николов, одговорен за лекувањето на пациентите во странство.
Не можеме да го потврдиме идентитетот се уште. Имаме информација дека еден од повредените пациенти кои се лекуваат во Литванија им подлегнал на повредите. Ќе имаме состанокот на Кризниот штаб, а потоа и министерството за здравство ќе има прес-конференција. Се уште има 4-5 пациенти кои се во критична состојба, двајца од нив се во Грција, двајца во Литванија, изјави д-р Николов за „Република“.
Министерството за здравство закажа прес-конфренција во 13,30 часот на која се очекува официјална потврда на идентитетот на починатиот пациент.
Дел од медиумите објавија дека станува збор за Александар Карадаковски, кој што бил управител на МММ Кафе дооел, кој што управувал и со дискотеката „Пулс“ во Кочани. Карадаковски, кој работел како шанкер во диско клубот, беше тешко повреден во пожарот.
На 16 март во дискотеката „Пулс“ се случи пожар во кој загинаа 59 лица, од нив 6 деца, а околу 200 беа повредени, од нив 25 деца. Дискотеката работела со фалсификувана лиценца.
Вкупниот број на осомничени за пожарот во дискотеката „Пулс“ во Кочани засега е 34 физички лица, откако државниот јавен обвинител Љупчо Коцевски соопшти дека е отворена истражна постапка против 27 физички, три правни лица и против седум полициски службеници од СВР Штип и Полициската станица (ПС) Кочани кои давале позитивни мислења за неисправниот објект да добие дозвола од Министерството за економија. Во 30-дневен притвор се 31 осомничен, меѓу кои и тројца градоначалници на Кочани, како и групата од 7 инспектори и началници од СВР Штип и од ПС Кочани.
