Жена од Македонија загина во страшна сообраќајна несреќа во Албанија

Тешка сообраќајна несреќа во Албанија однесе два човечки животи, а меѓу загинатите е и Малтина Ферати од Тетово.

Несреќата се случила денеска, 14 ноември, околу 10:15 часот, во близина на тунелот Муриз, кај местото Џибер, на патот познат како Рута на Арбр.

Според првичните информации од албанската полиција, дошло до директен судир меѓу две патнички возила. Во несреќата животот го загубиле возачот на едното возило, Бледијан Османи, и Малтина Ферати, која се наоѓала како сопатничка во другиот автомобил.

Уште пет лица се повредени и биле пренесени во болница за укажување медицинска помош и лекарски прегледи.

На местото на несреќата пристигнале полициски и истражни екипи, кои работат на утврдување на причините и околностите под кои дошло до трагичниот судир.

Веста за смртта на тетовката претставува уште една трагична загуба за нејзиното семејство, блиските и пријателите.

Надлежните институции продолжуваат со истрагата за утврдување на сите детали од несреќата.