Македонски
Претседателот на иранскиот парламент и главен преговарач во разговорите со САД, Мохамад Багер Галибаф, изјави дека Ормуската Теснина може повторно да биде отворена само доколку Вашингтон претходно ги исполни сите услови на Техеран, пренесува државната новинска агенција ИРНА.
Доколку тоа не се случи, нема да има враќање на претходната состојба во преговорите, рече Галибаф, додавајќи дека ставовите на Иран се јасни и не подлежат на преговори.
Галибаф истакна дека „Иран мора и да се бори и да преговара“.
Техеран ќе употреби воена сила за да ги одбие непријателите, но и дипломатија за да ги зацврсти успесите на бојното поле кога ќе дојде вистинскиот момент, рече претседателот на иранскиот парламент.
Во саботата, шефот на иранскиот Врховен совет за национална безбедност, Мохсен Резаеи, сигнализираше подготвеност на Иран да ја заврши војната со САД врз основа на рамковниот договор што двете земји го склучија во јуни.
Резаеи наведе седум услови. Меѓу другото, Техеран бара САД да ги ослободат замрзнатите иранските средства, да ја прекинат војната на сите фронтови и да ја укинат блокадата на иранските пристаништа и бродови. Иранското раководство исто така бара Вашингтон да се воздржи од мешање во внатрешните работи на земјата.
Овие точки, според Техеран, се во согласност со јунскиот договор, кој имаше за цел да го отвори патот за траен договор. Резаеи исто така побара САД да ги исполнат сите услови пред да може да продолжат понатамошните преговори. Се очекува во тие разговори да се опфати и иднината на иранската нуклеарна програма.
