Македонски
Сообраќајот на државните патишта во земјава во моментов се одвива без поголеми проблеми, а коловозите во најголем дел се суви. Надвор од населените места интензитетот на сообраќај е умерен, додека на граничните премини од македонска страна нема подолги задржувања при влез и излез од државата.
Од АМСМ апелираат до возачите да ја приспособат брзината според условите на патот, да ја следат сообраќајната сигнализација и да бидат особено внимателни на делниците кои минуваат низ котлини, речни долини и клисури. На овие места постои можност за појава на одрони.
Посебна внимателност се препорачува на патните правци Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен преку Националниот парк Галичица е отворен за сообраќај за сите видови возила чија вкупна тежина не надминува 3,5 тони.
Кај граничниот премин Делчево е воспоставен времен режим на сообраќај поради реконструктивни активности. Измената е во сила од 9 септември, но од АМСМ информираат дека преминот функционира непрекинато и дека сообраќајот се одвива нормално додека траат градежните работи.
Изменет режим има и пред наплатната станица Преод. Поради санација на косина на автопатот А4, на делницата Миладиновци – Свети Николе – Штип, ваквиот режим ќе биде во сила до 1 октомври 2026 година.
Во Штип, кај мостот на реката Брегалница, исто така е воспоставен времен режим поради санација на мостот.
Градежни работи се изведуваат и на повеќе мостови долж државниот пат А2 Гостивар – Стража. Во тек е санација на мостот бр. 4 – Вијадукт на Атанасова Река, како и на мостот бр. 7 – Вијадукт на Дол.
Санациски активности има и на мостовите на патот А2 кај село Желино, и тоа во двата правци – од Скопје кон Желино и обратно.
На автопатот А1, на делницата Смоквица – Гевгелија, сообраќајот се одвива во времен режим поради изградба на премин за интерконективен гасовод под автопатот.
Изменет режим е воспоставен и на скопската обиколница, на патот А2, каде се рехабилитира делница долга околу 250 метри меѓу клучките Волково и Кондово. Поради работите, затворена е левата лента наменета за претекнување.
На регионалниот пат Косоврасти – Мелнички Мост важи времен режим поради санација на свлечиште.
Во рамки на изградбата на Коридор 10Д, сообраќајот на патниот правец Прилеп – Битола се пренасочува по регионалниот пат на потегот од клучката Лагово до Тополчани.
Посебен режим важи и за движењето низ Јасен на релацијата Скопје – Македонски Брод и обратно. Возачите треба да ги почитуваат утврдените временски интервали.
Во правец Скопје – Македонски Брод, движењето е дозволено од 07:30 до 09:00 часот, од 12:00 до 12:45 часот и од 16:00 до 18:00 часот.
Во обратниот правец, Македонски Брод – Скопје, дозволените термини се од 06:00 до 07:00 часот, од 10:30 до 11:00 часот, од 13:00 до 13:45 часот и од 18:30 до 20:00 часот.
АМСМ ги повикува возачите да бидат внимателни, да ја почитуваат поставената сигнализација и да ја приспособат брзината, особено на делниците каде што во моментов се изведуваат градежни и санациски работи.
