Македонски
На 2 април во 20 часот Сцена 105, театарот „Војдан Черрнодринскии“ при НУЦК „Марко Цепенков“ од Прилеп премиерно ќе ја изведе претставата „Саатот“ од Лидија Митоска-Ѓорѓиевска, а во режија на Кристина Димитрова.
Драматург е Лидија Митоска-Ѓорѓиевска, сценoграфијата и костимите се на Благој Мицевски, а музиката на Филип Јездиќ и Томе Темелкоски
Играат: Филип Јездиќ, Димитар Ѓорѓиевски, Наташа Ачански и Ана Митоска.
Персонифициран ѕиден часовник е дел од животот на еден брачен пар – постојано ги следи, им го окупира просторот и буквално им го одбројува времето. Проблемот започнува токму од нивниот различен однос кон времето: додека мажот е спокоен и нема проблем со присуството на саатот, на жената ѝ пречи неговото непрекинато чукање, ја прави нервозна и премногу свесна за поминувањето на времето. Таа упорно го наведува сопругот да заминат некаде и да почнат да прават нешто значајно со своите животи пред да биде предоцна, но каде и да оди, што и да прави, таа не успева да се ослободи од чукaњето на саатот. Времето не гарантира смисла – ни овде, ни никаде.
Ова е претстава за судирот меѓу објективното и субјективното време кои ретко се синхронизирани, но и за повторливоста наспроти минливоста – две спротивности од кои колку и да бегаме, секогаш, без исклучок, нѐ наоѓаат.
