Македонски
Белгиската полиција приведе две лица на аеродромот „Завентем“ во Брисел, откако во нивните куфери биле пронајдени над 108 килограми кокаин, чија вкупна вредност на црниот пазар се проценува на најмалку 4,3 милиони евра.
За време на царинска проверка на аеродромот во Брисел, во куферите на две лица беше пронајдено големо количество кокаин. Вкупното количество се проценува на нешто над 108 килограми, соопшти белгиското Јавно обвинителство.
Вниманието на царинските службеници го привлекло тоа што куферите на осомничените, на возраст од 19 и 23 години, биле „значително потешки“ од дозволеното.
Извори од истрагата за белгискиот јавен радиодифузен сервис ВРТ изјавиле дека во овој случај не станува збор за класични шверцери на дрога.
Ова е дело на криминална организација која потплатува луѓе на аеродромите со цел да пренесат куфери полни со дрога со авион, изјавил истиот извор.
Според него, овие организации ангажираат луѓе кои на некој начин добиваат пристап до просторот на аеродромот каде пристигнува багажот и едноставно ги земаат куферите со дрога.
