Македонски
Пристигнати се тимови од странство со големо искуство во областа на рехабилитација на пациенти со изгореници кои во моментов прават евалуација на просторните услови, апаратурата во неколку центри за рехабилитација на пациенти со изгореници, информираат од Министерството за здравство.
Од МЗ соопштија дека пациент од повредените лица од пожарот во Кочани кој беше хоспитализиран во медицински центар во Австрија, денеска се враќа во државава, по што согласно протоколите ќе биде задржан под 24-часовен надзор.
Со тоа, во странските медицински центри се третираат 80 пациенти, од кои двајца се третираат амбулантски, а нема промена во нивната состојба во однос на минатите денови.
Во изминатото деноноќие на Клиниката за пластична хирургија е примен пациент кој е вратен од Грција и по неопходните испитувања ќе биде пуштен на домашно лекување. Во моментов на оваа Клиника се хоспитализирани тројца пациенти.
Во изминатото деноноќие нема згрижени пациенти на Клиниката за токсикологија.
Во ГОБ 8 Септември се хоспитализирани 3 пациенти, а во Хируршката клиника Свети Наум остануваат 6 пациенти кои се хоспитализирани на одделение.
На Клиниката за пулмологија се хоспитализирани двајца пациени, додека во приватните установи останува непроменета состојбата со бројот на хоспитализирани пациенти.
На 16 март во кочанската дискотека „Пулс“ која работела со фалсификувана лиценца изби пожар во кој загинаа 59 лица од кои шест деца, а околу 200 беа повредени од кои 25 деца.
