Македонски
Иран ги информираше земјите-членки на Меѓународната поморска организација (ММО) дека „бродовите кои не се непријателски“ можат да поминат низ Ормускиот Теснец ако се координираат со иранските власти, објавија странските медиуми.
Во писмо испратено денеска до членовите на ММО, иранското Министерство за надворешни работи соопшти дека Техеран „презел неопходни и пропорционални мерки за да ги спречи агресорите и нивните поддржувачи да го користат Ормускиот Теснец за да ги унапредат непријателските операции против Иран“, објави „Ројтерс“.
Техеран во писмото наведува дека бродовите поврзани со САД и Израел, како и „другите учесници во агресијата, не ги исполнуваат условите“ за безбедно и пријателски да поминат низ Ормускиот Теснец.
Агенцијата на ОН за превоз со седиште во Лондон е одговорна за регулирање на безбедноста на меѓународниот превоз и спречување на загадувањето и вклучува 176 земји-членки.
Војната меѓу САД и Израел против Иран речиси целосно ги запре пратките од околу една петтина од светската нафта и течен природен гас преку Ормускиот Теснец, предизвикувајќи прекини во снабдувањето и поттикнувајќи ги цените на суровата нафта.
