Македонски
Европа би можела да се соочи со потешкотии во снабдувањето со гориво и губење на работни места доколку регулаторите не го одобрат договорот на шведската групација „Гунвор“ за преземање на меѓународните средства на руската компанија „Лукоил“ во вредност од околу 22 милијарди долари.
Извршниот директор и мнозински сопственик на „Гунвор“, Торбјорн Торнквист, изјави дека шведската компанија со седиште во Женева треба да ги преземе активите на „Лукоил“ во Србија, Бугарија и Романија, како и мрежите на бензински пумпи во Европа и САД, и нафтените и гасните полиња на Блискиот Исток, Централна Азија и Африка.
Реализацијата на договорот зависи од одобрувањето на американските, британските и швајцарските регулатори, а времето е ограничено поради новите американски санкции против „Лукоил“ и „Роснефт“, кои стапуваат во сила на 21 ноември.
Торнквист предупреди дека продолжувањето на лиценците за работа на „Лукоил“ е клучно, бидејќи во спротивно „капацитетот на рафинериите би можел сериозно да биде загрозен“. Рафинеријата на Лукоил во Бургас обезбедува повеќе од две третини од горивото во Бугарија, додека Петротел во Романија покрива околу една третина од нафтеното рафинирање во таа земја. Секоја евентуална прекината работа директно би го погодила снабдувањето и енергетската стабилност на регионот.
Шведскиот милијардер ги отфрли шпекулациите дека Гунвор само привремено го презема имотот на Лукоил, нагласувајќи дека властите ќе бараат „целосно прекинување на сопственичките врски“ со руската компанија.
Историските врски на Гунвор со Русија ја комплицираат трансакцијата. Еден од коосновачите на компанијата, Генадиј Тимченко, близок сојузник на рускиот претседател Владимир Путин, го продаде својот удел на Торнквист откако беше опфатен со санкции во 2014 година. Иако Гунвор постепено се повлече од руските проекти, ризикот за репутација останува.
Одобрението од Канцеларијата за контрола на странски средства (OFAC) при Министерството за финансии на САД е неопходно за финализирање на трансакцијата, особено по неодамнешното ставање на Лукоил и Роснефт на листата санкционирани субјекти.
