Македонски
Европската воздухопловна и одбранбена компанија „Ербас“ соопшти денеска дека добила договор вреден 30 милиони евра (35,25 милиони долари) од европска агенција.
Станува збор за рамковен договор со Европската агенција за поморска безбедност (EMSA) за обезбедување услуги со далечински управувани воздухопловни системи (RPAS) за повеќенаменски поморски надзор, преку беспилотниот летален систем Flexrotor.
Овие услуги ќе ги унапредат мисиите на крајбрежните стражи, обезбедувајќи проширен опсег на надзор долж крајбрежјето и можности за долготрајни операции, вклучително и потрага и спасување, контрола на рибарството и заштита на животната средина, како и откривање нелегални поморски активности, соопшти компанијата.
Почетниот рамковен договор е склучен за период од две години, со можност за продолжување за уште две едногодишни опции, со што максималното времетраење на испораката може да достигне до четири години, наведоа од „Ербас“.
Услугите треба да започнат во 2026 година, а операциите ќе ги извршува францускиот давател на услуги „Екстенсе“, соопшти „Ербас“.
Надзорните способности на системот Flexrotor ќе ги поддржат надлежните национални органи на земјите членки на ЕУ, Норвешка и Исланд, како и релевантните институции на Европската Унија.
Според договорот, системите Flexrotor ќе можат да се распоредуваат во две паралелни операции, со локации за полетување во која било земја учесничка, при што постои флексибилност за додавање дополнителни паралелни операции доколку се побара, додава компанијата.
Во моментов, акциите на „Ербас“ се тргуваат по цена од 192,14 евра, што претставува пад од 0,42 проценти на Париската берза.
