Македонски
ВМРО-ДПМНЕ реагира на обвинувањата од СДС за наводен политички прогон во случајот со Филип Андонов Сокол, оценувајќи дека станува збор за обид за манипулација на јавноста.
Од владејачката партија посочуваат дека судијата кој ја донел пресудата против Андонов Сокол е директно поврзан со поранешни структури блиски до СДС, а не со ВМРО-ДПМНЕ, како што тврдат од опозицијата.
„Судијата што ја изрече пресудата е син на јавната обвинителка Елизабета Јосифовска, поранешен дел од Специјалното јавно обвинителство, која учествуваше во замрзнувањето на имотот на ВМРО-ДПМНЕ“, се наведува во соопштението.
Дополнително, од ВМРО-ДПМНЕ тврдат дека истиот судија бил поставен во Кривичниот суд од поранешниот претседател Иван Џолев, кадар на Зоран Заев, и тоа со само една година работен стаж во одделот за организиран криминал.
Во соопштението се посочува и дека обвинителка во предметот е Валентина Беслимовска, за која велат дека е истата обвинителка што претходно го повлекла обвинението против Зоран Заев, со што тој бил амнестиран.
„Како овие судии и обвинители можат да се поврзат со ВМРО-ДПМНЕ? Луѓето кои дејствуваа во време на Заев и Филипче можат да бидат само дел од системот на СДС“, порачуваат од ВМРО-ДПМНЕ.
Од партијата заклучуваат дека обвинувањата за политички прогон се неосновани и претставуваат обид СДС да ги прикрие сопствените врски со правосудниот систем од времето кога биле на власт.
Претходно, опозицискиот Социјалдемократски сојуз на Македонија (СДСМ) преку соопштение упати остри критики до актуелната власт, обвинувајќи ја за, како што велат, директна репресија врз партиски функционери преку „нарачани судски пресуди“.
Од СДСМ тврдат дека коалицијата ВМРО-ЗНАМ ја активирала последната фаза од својата кампања, која според нив вклучува политички прогон на нивни членови. Како доказ го посочуваат случајот со Филип Андонов, поранешен директор на затворот „Скопје“ во Шуто Оризари и член на Извршниот одбор на СДСМ, кој денеска беше осуден.
„Ги поставија своите судии и обвинители и тргнаа. Нема повеќе независно судство ниту независно обвинителство. Сè ставија во своите канџи“, се наведува во партиското соопштение.
Опозицијата обвинува дека додека институциите, како што велат, експресно носат пресуди против нивни функционери, истовремено ги игнорираат пријавите за криминал и корупција што СДСМ ги објавува во јавноста.
„По носењето Декрет и забраната за слобода на говор со предавничката Резолуција, гледаме нарачани судски пресуди и законски казни за функционерите на СДСМ“, додаваат од партијата.
Од СДСМ тврдат и дека за време на, како што го нарекуваат, политичкиот прогон, функционери на ВМРО-ДПМНЕ и ЗНАМ се богатат преку „криминални тендери“.
Во соопштението, опозициската партија порачува дека притисоците нема да ја запрат нивната борба против власта, но и против оние кои, според нив, „одвнатре ја подриваат партијата“.
„Никој нема да нѐ запре. Сите ќе одговарате. Работата не е завршена“, се додава во реакцијата на СДСМ.
