Македонски
Во рамки на 21-то издание на фестивалот Танц Фест вечер во Младинскиот културен центар во Скопје публиката ќе може да ги проследи „Мокументари“ и „Драфт 1 (вортекс)“ – новите танцови дела на кореографката Адријана Данчевска Ровчанин.
„Мокументари“ е танцова претстава која со ироничен тон и препознатлив хумор се зафаќа со една од најконтроверзните теми на денешницата – политичката сцена. Танцот овде не е само израз – тој станува метафора на нестабилноста, на постојаната промена, но и на отпорот. Со тело како сведок, но и како чинител, изведувачите Дејан Битровски и самата Данчевска Ровчанин го преиспитуваат сопствениот идентитет во контрадикторниот пејзаж на моќ, влијание и самоопределување. Сценографијата на Ивана Мојсовска и музиката на Александар Гроздановски го заокружуваат просторот во кој се создава овој динамичен и провокативен сценски дијалог. Претставата беше премиерно прикажана на отворањето на „Денови на македонски кореографи“ на малата сцена на Националната опера и балет, информира Интерарт културен центар.
Публиката ќе има можност да го проследи и „Нацрт 1 (вортекс)“, кратка кореографска етапа во која настапуваат студентите од Катедрата за современ танц при Универзитетот „Гоце Делчев“ – Штип. Претставата е дел од проектот „УГД – Чекор кон светот 2025“, кој ги афирмира младите изведувачи и создава простор за нивна уметничка зрелост и јавна видливост.
Двете дела се потпишани со музиката на Александар Гроздановски – HERZEL, а костимографските решенија во „Нацрт 1“ се на Скопје танцов театар.
Билети можат да се купат на билетарницата на МКЦ и онлајн на bileti.mkc.mk
