Македонски
Во рамки на 25. „Есенски музички свечености“ вечер ќе се одржи камерен концерт „Впечатоци од Шпанија“. Ќе настапат Миреа Пинто – мецосопран и Владислав Броневецки – пијано (Шпанија).
Како што информира Дирекцијата за култура и уметност на Скопје, ова е последниот концерт на годинашните „Есенски музички свечености“. Концертот ќе се одржи во 20 часот во Салон 19:19 (Културно-информативен центар). Влезот е слободен.
Миреиа Пинто (родена во Манреса , Барселона – Шпанија) е добитничка на највисоки награди на неколку натпревари за пеење во Шпанија и Италија. Нејзиниот обемен репертоар, кој се движи од барок до современа музика, ги опфаќа жанровите: опера, ораториум и лид. Настапувала како солист со бројни камерни ансамбли и оркестри, под диригентство на познати маестра.
Досега учествувала на бројни концертни циклуси, музички фестивали и оперски изведби во Италија, Русија, Холандија, Германија, Грција, Андора, Франција, Монако, Јапонија, Чешка, Колумбија и Шпанија, со значајни настапи во водечките концертни сали и оперски театри.
Од 1992 година, таа има дуо со пијанистот Владислав Броневецки, со кого развива богата концертна активност низ повеќе земји, на фестивали и концертни циклуси, вклучувајќи ги и престижните концертни сали во Барселона, Москва, Токио и други.
Владислав Броневецки е пијанист од Владивосток, Русија, дипломирал на Конзерваториумот „Чајковски“ во Москва, каде студирал кај Елисo Вирсаладзе. Добитник е на наградата „Tchaikovsky Grant“ и признанија од меѓународни натпревари, меѓу кои „Robert Schumann Competition“ во Германија. Настапува на бројни концерти и фестивали низ светот и соработува со истакнати уметници како Наталија Гутман и Хуан Диего Флорез. Работи како професор по пијано на Високата музичка школа на Каталонија (ESMUC) во Барселона.
